मुंबई मराठी साहित्य संघ आणि स्वामीराज प्रकाशन यांच्या संयुक्त विद्यमाने ४८वे महानगर मराठी साहित्य संमेलन आज, शनिवार, ३१ जानेवारी रोजी गिरगाव येथील साहित्य संघ मंदिरातील डॉ. अ. ना. भालेराव सभागृहात आयोजित करण्यात आले आहे. हे एकदिवसीय संमेलन ‘मुंबई’ आणि मुंबईतील ‘लोकल ट्रेन’ या विषयाभोवती केंद्रीत असणार आहे.

या साहित्य संमेलनाचे उद्घाटन राष्ट्रपती शौर्यपदक विजेते व अतिरिक्त पोलिस महासंचालक विश्वास नांगरे पाटील यांच्या हस्ते होणार असून, हास्यजत्रा फेम ज्येष्ठ दिग्दर्शक सचिन गोस्वामी अध्यक्षस्थान भूषविणार आहेत. ज्येष्ठ साहित्यिक प्रा. उषा तांबे स्वागताध्यक्ष असणार आहेत.

संमेलनाची सुरुवात सकाळी ९ वाजता शाहीर नीलेश जाधव यांच्या मुंबईवरील पोवाड्याने होणार आहे. यानंतर संकेत तांडेल लिखित ‘लोकल’ ही एकांकिका सादर करण्यात येणार आहे. ‘आपली मुंबई खरेच बदलली आहे का?’ या विषयावर होणाऱ्या परिसंवादात ज्येष्ठ पत्रकार कुमार कदम, महापालिकेच्या पुरातत्त्व खात्याचे माजी अधिकारी संजय आज साहित्य संघ मंदिरात आयोजन साहित्य संस्कृतीसावंत आणि ज्येष्ठ अभ्यासक अरुण पुराणिक सहभागी होणार आहेत. तसेच, गोविंद नारायण माडगावकर यांचे मुंबईवर्णन आणि नितीन साळुंखे यांच्या ‘अज्ञात मुंबई’ या पुस्तकातील उताऱ्यांचे अभिवाचन अभिनेता-दिग्दर्शक मंगेश सातपुते आणि अभिनेत्री सुप्रिया विनोद करणार आहेत.

मुंबईच्या खाद्यसंस्कृतीवर ज्येष्ठ संपादक संजीव साबडे, तर मुंबईतील वाचन संस्कृतीवर संपादक मुकेश माचकर यांचे गप्पाष्टक रंगणार आहे. संमेलनाचा समारोप लोकलमधील ‘रील स्टार’ सानिका कणसे हिच्या रेल्वे भजनांनी होणार आहे. या साहित्य संमेलनासाठी मुक्त प्रवेश असून, मुंबई तसेच जवळच्या शहरांतील साहित्यप्रेमी आणि प्रवाशांनी मोठ्या संख्येने उपस्थित राहावे, असे आवाहन आयोजक मुंबई मराठी साहित्य संघ आणि स्वामीराज प्रकाशन यांनी केले आहे.